بسم الله الرحمن الرحيم
الرجولة الحقيقية
الحاج....ماتقومي بقي بقالك ساعتين بتتعشي ياهنية
عايزين نشرب الشاي.... قبل ماتيجي التمثلية
هنية...الله.... في إيه ياحاج ماانت عارف بحب أكل علي مهلي عشان سناني بعافية ياأبوسعدية
قوم ياحاج علق علي الشاي ...ومتنساش سكري ذيادة شوية
إنت إتجنيت ياولية...انت بتقولي إيه ...سمعيني كدا تاني ياولية
بقولك علق علي الشاي...لاقلت لم الغسيل... ولا خد الشقة كنس ياأبوسعدية
إنت باينك عايزة قلمين...... ياولية
وكبرتي.... وخرفتي ....وعقلك راح يافقرية
إزاي ياحاج تسب عقلي....وهو أحسن حاجة فيا
شاي إيه..إل عايزاني أعمله.... هو أنا مش مالي عينك ياولية
في إيه مالك....قفشت كدا ياأبوسعدية
وفيها إيه لو تعمله... قولي هينقص إيه من رجولتك .ياضي عنيي
خلصي عشاكي...وقومي أعمليه ...بلا كتر كلام ..ورغي ياولية
ياسلام ياحاج......
هو يعني الراجل ميبقاش راجل....غير لما ينكد علي مراته كل ماتطلب نقدية
ولا يقوم فيها ياكلها...لو طلبت تزور حد من أهلها كل شهر وشوية
وينصب لها المحكمة...لو طلبت يساعدها بكوبيتين شاي وقت التمثلية وآاااااه لو طلبت منه تأجل الطبيخ...عشان تعبانه شوية
يتحول لأسد جعان....وقدامه فريسة طازة ياأبوسعدية
كلللللللل كلامك داااااااا في الفاضي ياهنية
في الفاضي ليه....ولا عشان جيت علي الجرح ياعنيي
إحنا شغالين...وتعبانين....وقرفانين.....وكل ال يخطر علي بالك بتعملي إيه طول النهار ياهنية
ماهي دي الحقيقة....وراكم إيه ياختي من طلعتها لحد مساها ياولية
ولا حاجة ياحاج....يادوب مانكير وباديكير .وطلعة للنادي كل يوم الضهرية
وكل ال مغلبنا....مش عارفين هنقضي الويك إند فين ياأبوسعدية
بطلي تريقة..... بقي ياولية ...بتتكلمي ليه ماهي دي شغلتك الأصلية
ليه ياحاج....كانوا جوزوني لك جارية
تاخد حقوقها ......وتعدمها العافية... وتقول حقوق زوجية
تشقي ...وتتعب... وياريت. في كلمة حلوة تنسيها الأسية
مبسوطة ياختي......
أهي التمثلية جت...... من غير مانشرب الشاي يافقرية
والنبي ماانا عاملة ياحاج....غير لما تبوس دماغي وإيديا
طب ياختي تعالي......ولا تزعلي ياهنية
إحنا لسه صغيرين ياحاج....تبوس يعني تعترف بحقوقي الزوجية
وحقي عليك...تساعدني في مهامي شوية
ومترميش علي العيال...... أنا برضوا كبرت ياأبوسعدية.
ولو بإيدك تساعد....تساعد ومتخافش مش هشير لأهلك حياتنا الشخصية
هي دي الرجولة ياحاج....مش بالزعيق.. والضرب ..وقلة القيمة.. تاخدوا حقوقكم ياأبوسعدية
خلاص.......قلبك أبيض ياهنية
خلاص .......مش زعلانه ياحاج...وعلي مااشيل الأكل تكون عملت لنا الشاي ياروح هنية.
آاااااااه....... ياولية ياعنادية
دايما بتغلبيني .....بكلامك ياولية .
أعملك إيه ياحاج......
ماانت سايق فيها ....ولا كأن لي حقوق شخصية
حقوق إيه.... ياأم حقوق...كل داااااا عشان كوبيتين شاي ياهنية
لاء ياحاج مش عشان كدا....عشان الرجالة واخدة راحتها علي الآخر والزوجة عندهم ......يعني الرجل الأخضر ياأبوسعدية
لا بتكل...ولا بتمل.....ولا محتاجة صيانة دورية
لا بتتعب....ولا بتزهق.... ولا من حقها... راحة نفسية
إطلعي من نافوخي بقي ......وقولي عايزة إيه ياولية
عايزاك....تبلغ كلامي لكللللللللل الرجالة ياأبو سعدية
الرجولة ........ياخويا مش خانة في بطاقة
الرجولة........شاحن لما تخلص مني الطاقة..
اللهم اهدي أزواجنا جميعا
وإهدنا لهم ياأرحم الراحمين .
وإلي اللقاء مع جديد هنية .
بقلم.....دعاء حجر....
تعليقات
إرسال تعليق